23 тамызда өтетін құрылтай сайлауы – ел өміріндегі маңызды қоғамдық шаралардың бірі. Бұл – әр азаматтың өз таңдауын жасап, елдің болашағына деген азаматтық ұстанымын білдіретін жауапты күн.
Еліміздің ертеңі тек билік пен қоғамның емес, әрбір азаматтың белсенділігіне байланысты. Сондықтан сайлауға қатысу – өз пікірімізді білдірудің, ел дамуына деген көзқарасымызды танытудың маңызды жолы.
Бүгінгі таңда қоғамның алдында көптеген маңызды міндеттер тұр. Елдің әлеуметтік-экономикалық дамуы, жастардың болашағы, ауыл-аймақтың жағдайы, білім мен мәдениеттің өркендеуі – барлығы да халықтың белсенді азаматтық ұстанымын талап етеді. Осындай кезде әрқайсымыздың таңдауымыздың мәні зор.
Сайлау күні «Менің бір дауысымнан не өзгереді?» деген ойға жол бермейік. Керісінше, «Менің дауысым – менің азаматтық таңдауым» деген қағиданы ұстанайық. Себебі ел тағдырына қатысты кез келген шешім халықтың белсенді қатысуымен ғана мағыналы болады.
23 тамызда сайлау учаскесіне барып, өз таңдауыңызды жасаңыз. Үлкеннің батасы, жастың жігері, еңбек адамының тәжірибесі, ұстаздың парасаты, кәсіпкердің бастамасы – бәрі де ел болашағын қалыптастыруға қажет. Белсенді азамат – өз құқығын ғана емес, өз жауапкершілігін де сезінетін азамат.